“ચતુરાઈ” માણસ ખરેખર પોતાને ચતુર સમજે છે પણ એ આખરે તો

27

“પાસ છે ..”
પાસે આવેલા કંડક્ટરની આંખમાં આંખ પરોવીને નટુ ભાઈ બોલી ગયા. જો કે તો પણ દિલ એક થડકારો ચૂકી તો ગયું જ . કંડક્ટરે પણ પાસ જોવા માંગ્યા વગર નટુભાઈ પર વિશ્વાસ રાખીને પીઠ ફેરવી લીધી .

હવે નટુ ભાઈનો જીવ હેઠો બેઠો .આજના દિવસના વીસ રૂપિયા તો સહેજે બચી ગયા હતા. પોતાની જ ચતુરાઈ પર પોરસાતા નટુભાઈના હોઠના ખૂણે સ્મિત ફરકી ગયું . આગામી દસ મિનિટ સુધી બસની બારીમાંથી આવતી ઠંડી હવા નટુભાઈ માણી રહ્યા . પેલું સ્મિત હજી પણ રહી રહીને એમના ચહેરા પર ફરકી જતું હતું . આવું જો મહિનામાં પાંચેક વાર , આવતા અને જતા થઇ શકે તો સહેજે બસો રૂપિયા બચી જાય . એમનો વેપારી જીવ ગણત્રી માંડી રહ્યો . બીજા ત્રણ બસ સ્ટોપ અને એમને ઉતારવાનું સ્થળ આવી જવાનું હતું .

અચાનક બસ ઉભી રહી , અને બસના પાછળ બારણાથી ટિકિટ ચેકર દાખલ થયો . નટુભાઈનું ગળું એકદમ સુકાવા લાગ્યું . બસ તો આગળ દોડવા લાગી હતી , પણ હવે નટુભાઈના કપાળે બાઝેલા પરસેવાના ટીપાને બારીમાંથી આવતો ઠંડો પવન પણ દૂર કરી શકે તેમ નો’તો. બસ એમની સીટથી ત્રણ જ સીટ દૂર ટિકિટ ચેકર ,કોઈ પેસેન્જરની ટિકિટ ચેક કરી રહ્યો હતો . એક મિનિટ તો નટુ ભાઈને થયું કે આગલા બસ સ્ટોપ પર ઉતરી જાવું જોઈએ ,પણ એમ કરતા ટિકિટ ચેકરને શંકા જાય તો ?

અસમંજસમાં પડેલા નટુભાઈને પોતાની તરફ ટિકિટ ચેકર આવતો દેખાયો . વીસ રૂપિયા બચાવવા જતાં દંડમાં ભરવાના આવતા અઢીસો રૂપિયા એમને સ્પષ્ટ દેખાયા .બધી ચતુરાઈ એમને ચોપટ થઇ જતી લાગી.

નટુભાઈના સદભાગ્યે એમને ઉતારવાનું બસ સ્ટેન્ડ આવે એ પહેલા , ટિકિટ ચેકર બસમાંથી ઉતરી ગયો હતો .છૂટકારાનો દમ લેતાં નટુભાઈ પોતાના બસ સ્ટેન્ડ ઉપર ઉતરી ગયા. સામે જ મહાકાળીનું મંદિર હતું . નટુભાઈ દીનવદને મહાકાળીની મૂર્તિ સામે હાથ જોડીને ઉભા રહી ગયા . નટુ ભાઈ સ્વગત જ બબડી રહ્યા હતા ..”હે મા,તું બધો હિસાબ રાખે છે ,આજે સવારે ઉતાવળમાં તને હાથ જોડવાનું ભૂલી ગયો હતો તો તેં તરત જ પરચો બતાવી દીધો .હવેથી ક્યારેય સવારના તારા દર્શન કર્યા વગર ધંધે જાવાની ભૂલ નહિ કરું .

બચેલા વીસ રૂપિયામાંથી બે રૂપિયા , મંદિરની દાન પેટીમાં નટુભાઈએ પધરાવ્યા ,અને મંદિરના પગથિયાં ઉતરતા હતા ,ત્યાં જ ભીખ માંગતી એક સ્ત્રી આવીને એમની પાસે ઉભી રહી .એ સાથે જ નટુ ભાઇનો મિજાજ બગડ્યો …’હટ ,સાલા હરામ હાડકાંના ,મફતનું જ ખાવું છે .” નટુભાઈની ત્રાડથી થડકીને ભિખારણ બે ડગલાં પાછળ હટી ગઈ .

અને ભિખારણથી પીઠ ફેરવીને નટુભાઈએ ઘરની વાટ પકડી .

લેખક : હેમલ વૈષ્ણવ

પોસ્ટને શેર કરો તથા લાઇક કરો અમારું પેજ Dealdil.com

તમે આ લેખ “Dealdil.com” ના માધ્યમથી વાંચી રહ્યા છો. આ લખાણની કોપી કરતા પહેલા અમારી લેખિત મંજૂરી લેવી જરૂરી છે. જો તમારી પાસે પણ કોઈ રસપ્રદ વાત છે અથવા કોઈ રસપ્રદ માહિતી છે જે અન્યો સુધી પહોંચવી જોઈએ તેવું તમને લાગે, તો અમને લખી મોકલાવો અમારા Email: blog@dealdil.com પર અથવા Whatsapp: 08000057004 પર. સાથે જ આવી અન્ય સકારાત્મક, રસપ્રદ અને પ્રેરણાત્મક સફર માટે અમારી સાથે જોડાઓ FacebookTwitter અને YouTube પર.

Leave a comment